اسلام آباد: چین کے بین الاقوامی مرکز برائے اقتصادی و تکنیکی تبادلات اور اقوام متحدہ کے ترقیاتی پروگرام نے پاکستان میں موسمیاتی آفات سے متاثرہ علاقوں کی بحالی، روزگار کے مواقع اور پائیدار ترقی کے لیے تعاون مزید مضبوط بنانے پر اتفاق کیا ہے۔ اقوام متحدہ کے ترقیاتی پروگرام پاکستان نے چین کے بین الاقوامی مرکز برائے اقتصادی و تکنیکی تبادلات کی نائب ڈائریکٹر جنرل لی شوئین کے اعلیٰ سطحی دورہ پاکستان کا خیرمقدم کیا۔ دورے کا مقصد پاکستان میں لچکدار بحالی اور پائیدار ترقی کے لیے باہمی تعاون کو مزید فروغ دینا تھا۔ دورے کے دوران چین کے بین الاقوامی مرکز برائے اقتصادی و تکنیکی تبادلات، چینی سفارتخانے، حکومت پاکستان، حکومت بلوچستان، اقوام متحدہ کے ترقیاتی پروگرام اور بلوچستان میں چین کی معاونت سے جاری منصوبوں سے مستفید ہونے والی آبادیوں کے نمائندوں نے شرکت کی۔ اجلاس میں بلوچستان میں سیلاب کے بعد روزگار کی بحالی کے لیے چین کی معاونت سے جاری پہلے مرحلے کی پیش رفت، حاصل ہونے والے تجربات، موجودہ منصوبوں کو وسعت دینے کے امکانات اور مستقبل میں تعاون کی ترجیحات پر تبادلہ خیال کیا گیا۔
اقوام متحدہ کے ترقیاتی پروگرام کے مطابق چین کی معاونت سے سیلاب کے بعد روزگار کی بحالی کے پہلے مرحلے سے بلوچستان میں ایک لاکھ باسٹھ ہزار سے زائد افراد مستفید ہوئے، جبکہ نئے مرحلے کو اقوام متحدہ کے ترقیاتی پروگرام کے وسیع تر سیلاب بحالی پروگرام کے تحت بحالی کے پہلے سے قائم پلیٹ فارم پر آگے بڑھایا جا رہا ہے۔ چین کے بین الاقوامی مرکز برائے اقتصادی و تکنیکی تبادلات کی نائب ڈائریکٹر جنرل لی شوئین نے کہا کہ 2027 پاکستان اور چین کے درمیان سفارتی تعلقات کے قیام کی پچہترویں سالگرہ کا سال ہے۔ دونوں ممالک نے گزشتہ پچہتر برسوں کے دوران مختلف چیلنجز میں ایک دوسرے کا ساتھ دیا اور باہمی اعتماد، دوستی اور تعاون کے مضبوط رشتے قائم کیے۔ انہوں نے کہا کہ عوام کے معیار زندگی میں بہتری دونوں ممالک کے دیرینہ تعاون کا اہم حصہ ہے، جبکہ یہ منصوبہ چین، اقوام متحدہ کے ترقیاتی پروگرام اور پاکستان کے درمیان لچکدار بحالی اور پائیدار ترقی کے لیے تعاون کی عملی مثال ہے۔
لی شوئین نے کہا کہ چین کا بین الاقوامی مرکز برائے اقتصادی و تکنیکی تبادلات متعلقہ چینی اداروں، اقوام متحدہ کے ترقیاتی پروگرام اور دیگر شراکت داروں کے ساتھ مل کر پاکستان بھر میں مزید چھوٹے اور خوبصورت روزگار اور معاشی ترقی کے منصوبے شروع کرنے کے لیے تیار ہے تاکہ دونوں ممالک کے عوام کو مزید عملی فوائد پہنچائے جاسکیں۔ چینی حکومت کے عالمی ترقی اور جنوب جنوب تعاون فنڈ کے تعاون اور حکومت بلوچستان کے اشتراک سے سیلاب کے بعد زرعی بحالی کا منصوبہ، جس کے تحت ہر قصبے کے لیے ایک مخصوص پیداوار کو فروغ دیا جائے گا، شروع کیا گیا ہے۔ منصوبے کے تحت بلوچستان کے سات اضلاع میں تقریباً ایک لاکھ دس ہزار افراد کو زرعی اور روزگار سے متعلق معاونت، تکنیکی تربیت، تین ہزار خواتین کے لیے خصوصی مدد اور ادارہ جاتی استعداد کار بڑھانے کی سہولیات فراہم کی جائیں گی۔
اقوام متحدہ کے ترقیاتی پروگرام پاکستان کے مقامی نمائندے ڈاکٹر سیموئل رزک نے کہا کہ موسمیاتی آفات چند گھنٹوں میں برسوں کی ترقی کو متاثر کرسکتی ہیں، اس لیے بحالی کا مقصد صرف ہونے والے نقصان کو پورا کرنا نہیں بلکہ ان کمزوریوں کو بھی دور کرنا ہونا چاہیے جو مستقبل میں لوگوں کی زندگیوں اور روزگار کو خطرے میں ڈالتی ہیں۔ انہوں نے کہا کہ چین اور حکومت بلوچستان کے ساتھ شراکت داری کے ذریعے فوری روزگار معاونت کو مہارتوں، مقامی استعداد کار میں اضافے اور معاشی مواقع سے جوڑا جا رہا ہے تاکہ متاثرہ آبادی نہ صرف موجودہ بحران سے نکل سکے بلکہ مستقبل کے موسمیاتی خطرات کا بھی زیادہ بہتر انداز میں مقابلہ کرسکے۔ تقریب کے دوران زرعی اور گھریلو باغبانی کے آلات بھی مستحق افراد کے حوالے کیے گئے۔ اقوام متحدہ کے ترقیاتی پروگرام کے مطابق یہ آلات زرعی پیداوار میں اضافے اور خواتین کے لیے گھریلو سطح پر باغبانی کے ذریعے آمدن کے مواقع پیدا کرنے میں معاون ثابت ہوں گے۔
چین کی معاونت سے سیلاب کے بعد بحالی کے دونوں مراحل سے بلوچستان میں تین لاکھ سے زائد افراد کے مستفید ہونے کی توقع ہے۔ منصوبوں کا مقصد روزگار کی بحالی، زرعی پیداوار میں اضافہ اور مستقبل کے موسمیاتی خطرات سے نمٹنے کے لیے آبادیوں کی استعداد بہتر بنانا ہے۔ تقریب میں بلوچستان کے سیلاب سے متاثرہ علاقوں سے تعلق رکھنے والی دو خواتین، بی بی زینب اور بی بی ناز نے بھی اپنے تجربات بیان کیے۔ انہوں نے بتایا کہ سیلاب سے ان کے خاندانوں کے روزگار کو شدید نقصان پہنچا، تاہم منصوبے کے تحت ملنے والی معاونت سے خواتین دوبارہ معاشی سرگرمیوں میں حصہ لے رہی ہیں اور گھریلو آمدن میں کردار ادا کررہی ہیں۔ خواتین نے گھروں کی تعمیر نو، مویشیوں کی بحالی اور خاندانوں کی کھوئی ہوئی معاشی استحکام کی بحالی کے لیے مزید معاونت کی ضرورت پر بھی زور دیا۔
حکومت پاکستان کے اقتصادی امور ڈویژن کے اقوام متحدہ ڈیسک کے مشترکہ سیکریٹری محمود احمد خان نے کہا کہ پاکستان سیلاب کے بعد بحالی کے لیے چین کی مسلسل معاونت اور متاثرہ آبادی تک عملی مدد پہنچانے میں اقوام متحدہ کے ترقیاتی پروگرام کے کردار کو قدر کی نگاہ سے دیکھتا ہے۔ انہوں نے کہا کہ اس طرح کے منصوبے روزگار کی بحالی، معاشی مواقع پیدا کرنے اور طویل مدتی بنیادوں پر موسمیاتی خطرات سے نمٹنے کی صلاحیت بڑھانے میں مددگار ہیں۔ حکومت بلوچستان کے محکمہ منصوبہ بندی و ترقیات کی چیف فارن ایڈ بیٹول اسدی نے کہا کہ سیلاب کے اثرات خواتین پر زیادہ شدت سے مرتب ہوتے ہیں، خصوصاً جب روزگار اور گھریلو آمدن متاثر ہو۔ ان کے مطابق خواتین کو دوبارہ معاشی سرگرمیوں میں شامل کرنا اور آمدن کے مواقع فراہم کرنا پائیدار بحالی کے لیے ضروری ہے۔ دورے کے دوران شجرکاری کی تقریب بھی منعقد ہوئی، جبکہ چین کے بین الاقوامی مرکز برائے اقتصادی و تکنیکی تبادلات کی نائب ڈائریکٹر جنرل نے اقوام متحدہ کے ترقیاتی پروگرام کی ملکی ٹیم کے ارکان سے بھی ملاقات کی۔ چین کے بین الاقوامی مرکز برائے اقتصادی و تکنیکی تبادلات اور اقوام متحدہ کے ترقیاتی پروگرام نے پاکستان میں جامع معاشی ترقی، پائیدار روزگار اور موسمیاتی آفات سے مضبوط بحالی کے لیے موجودہ شراکت داری کو مزید آگے بڑھانے اور نئے مواقع تلاش کرنے کے عزم کا اعادہ کیا۔