نجی ٹی وی چینل جیو نیوز کی 15 روزہ معطلی کے فیصلے کے بعد سوشل میڈیا اور مختلف مذہبی و سیاسی حلقوں میں بحث کا سلسلہ جاری ہے۔ متعدد صارفین اور تنظیموں کا مؤقف ہے کہ صرف چند روز کی معطلی کافی نہیں، بلکہ اس معاملے میں مکمل تحقیقات اور ذمہ داران کے خلاف قانون کے مطابق کارروائی ہونی چاہیے۔
یہ تنازع جیو نیوز پر نشر ہونے والی دستاویزی فلم سفر عشق کے بعد سامنے آیا، جس میں مبینہ طور پر مصنوعی ذہانت کے ذریعے ایسے مناظر دکھائے گئے جنہیں بعض مذہبی حلقوں نے مقدس شخصیات کی تصوراتی منظرکشی قرار دیا۔ ان حلقوں کا کہنا ہے کہ اس طرح کا مواد مذہبی جذبات کو مجروح کرنے کا باعث بن سکتا ہے۔
پاکستان الیکٹرانک میڈیا ریگولیٹری اتھارٹی نے اپنے حکم میں کہا کہ مذکورہ پروگرام میں موجود مناظر نشراتی ضابطہ اخلاق کی خلاف ورزی کے زمرے میں آتے ہیں، مذہبی جذبات کو ٹھیس پہنچانے کا باعث بن سکتے ہیں اور امنِ عامہ کے لیے بھی خطرہ بن سکتے ہیں۔ اسی بنیاد پر جیو نیوز کی نشریات 15 روز کے لیے معطل کی گئیں جبکہ مزید قانونی کارروائی کے لیے معاملہ ریگولیٹری کونسل کو بھی بھجوا دیا گیا۔
جیو نیوز نے واقعے پر معذرت کرتے ہوئے متنازع دستاویزی فلم کو تمام پلیٹ فارمز سے ہٹانے، اندرونی تحقیقات شروع کرنے اور ذمہ دار افراد کے خلاف کارروائی کا اعلان کیا ہے۔ چینل کا کہنا ہے کہ وہ پیمرا کے احکامات پر عمل کرے گا۔
فیصلے کے بعد مختلف سوشل میڈیا پلیٹ فارمز پر صارفین کی جانب سے مختلف آراء سامنے آئیں۔ بعض صارفین نے مؤقف اختیار کیا کہ صرف 15 روزہ معطلی کافی نہیں اور حکومت کو سرکاری اشتہارات، لائسنس اور دیگر قانونی معاملات کا بھی جائزہ لینا چاہیے، جبکہ دیگر صارفین کا کہنا ہے کہ پیمرا کی کارروائی قانون کے مطابق آگے بڑھنی چاہیے اور حتمی فیصلہ تحقیقات مکمل ہونے کے بعد کیا جانا چاہیے۔
جنگ میں امریکا کے 39طیارے تباہ ہوئے، امریکی رکن کانگریس نے تسلیم کرلیا
کچھ تبصروں میں جیو نیوز کی ماضی کی مذہبی پروگرامنگ، رمضان ٹرانسمیشنز اور دیگر متنازع نشریات کا بھی حوالہ دیا جا رہا ہے، تاہم یہ آراء متعلقہ افراد اور صارفین کے مؤقف پر مبنی ہیں اور ان کی آزادانہ تصدیق نہیں ہوئی۔
پیمرا کے مطابق معاملہ مزید تحقیقات کے لیے متعلقہ فورم کو بھجوا دیا گیا ہے اور آئندہ کارروائی تحقیقات اور قانونی کارروائی کے نتائج کی روشنی میں کی جائے گی۔
گوگل میپ نے خاندان اجاڑ دیا، کوئٹہ واقعے کی تفصیلات سامنے آگئیں