نیشنل ٹی ٹوئنٹی کپ، فیصل آباد اور بہاولپور نے میچز جیت لئے
اے بی ایس ڈویلپرز نیشنل ٹی ٹوئنٹی کپ کے ساتویں روز کھیلے گئے میچز میں فیصل آباد اور بہاولپور نے اپنے اپنے حریفوں کو شکست دے دی۔
گروپ اے کے پہلے میچ میں فیصل آباد نے پشاور کو 15 رنز سے شکست دی۔ فیصل آباد نے ٹاس جیتنے کے بعد پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 170 رنز بنائے۔ اوپننگ بلے باز عتیق الرحمن نے شاندار بیٹنگ کا مظاہرہ کرتے ہوئے 44 گیندوں پر 10 چوکوں کی مدد سے 72 رنز اسکور کیے اور مسلسل دوسری نصف سنچری بنائی۔ کپتان محمد عرفان خان نے 23 گیندوں پر دو چھکوں اور ایک چوکے کی مدد سے 32 رنز جبکہ مبصر خان نے 21 گیندوں پر دو چھکوں اور دو چوکوں کی مدد سے 27 رنز بنائے۔
پشاور کی جانب سے محمد نواز اور عثمان طارق نے دو دو وکٹیں حاصل کیں، جبکہ اسرار اللہ، محمد شعیب اور احسان اللہ نے ایک ایک کھلاڑی کو آؤٹ کیا۔ جواب میں پشاور کی ٹیم 32 رنز پر اپنے ابتدائی چار بلے باز گنوا بیٹھی۔ اسرار اللہ نے 47 اور نبی گل نے 43 رنز بنائے جبکہ محمد عمران جونیئر 18 رنز کے ساتھ ناٹ آؤٹ رہے، تاہم ٹیم مقررہ ہدف حاصل نہ کر سکی۔ فیصل آباد کے آفاق آفریدی نے 38 رنز دے کر چار وکٹیں حاصل کیں جبکہ شہزاد گل نے چار اوورز میں 21 رنز دے کر تین کھلاڑیوں کو آؤٹ کیا۔
فیصل آباد نے اپنے چاروں گروپ میچ مکمل کر لیے ہیں اور دو فتوحات کے ساتھ پوائنٹس ٹیبل پر تیسری پوزیشن پر موجود ہے۔ ٹورنامنٹ کے ہر گروپ سے ٹاپ دو ٹیمیں سیمی فائنل کے لیے کوالیفائی کریں گی۔
دوسرے میچ میں بہاولپور نے لاہور وائٹس کو چار وکٹوں سے شکست دے کر ٹورنامنٹ میں پہلی کامیابی حاصل کی۔ لاہور وائٹس نے پہلے بیٹنگ کرتے ہوئے مقررہ 20 اوورز میں پانچ وکٹوں کے نقصان پر 196 رنز بنائے۔ محمد فائق نے 42 گیندوں پر پانچ چوکوں اور تین چھکوں کی مدد سے 63 رنز بنا کر ٹاپ اسکورر رہے۔ طیب طاہر نے 34 گیندوں پر سات چوکوں کی مدد سے 46 رنز جبکہ فرحان یوسف نے 18 گیندوں پر چار چوکے اور ایک چھکا لگا کر 39 رنز اسکور کیے۔ محمد محسن 16 گیندوں پر تین چوکے اور دو چھکے لگا کر 32 رنز کے ساتھ ناٹ آؤٹ رہے۔
بہاولپور کی جانب سے محمد سرور آفریدی نے دو جبکہ محمد باسط اور کپتان محمد عمران نے ایک ایک وکٹ حاصل کی۔ جواب میں بہاولپور نے حیدر علی اور سعد خان کی نصف سنچریوں کی بدولت ہدف 19.4 اوورز میں حاصل کر لیا۔ سعد خان نے 30 گیندوں پر سات چوکے اور چار چھکے لگا کر شاندار اننگز کھیلی جبکہ پلیئر آف دی میچ حیدر علی 43 گیندوں پر پانچ چوکے اور چار چھکے لگا کر ناقابل شکست رہے۔ اوپنر محمد فیضان ظفر نے 28 رنز کی اننگز کھیلی۔